նորություններ
  • Ո՜վ ցաւագին Տիրամայր, ահա քու առջեւդ կը խոնարհիմ իբր խեղճ մեղաւոր: Ընդունէ՛ աղօթքներս եւ արցունքներս:
    Ողջոյն քեզ Մարիամ...
    Ո՜վ ցաւագին Մարիամ, բարեխօսէ՛ ինծի համար, որ քեզի կը դիմեմ: Ո՜վ ցաւագին Տիրամայր, հոգիս յուսահատ է եւ կարիքներու բեռին տակ կքած: Զօրացո՛ւր եւ մխիթարէ` զիս զաւակդ: Կը սիրեմ քեզ եւ կը պաղատիմ քեզի:
    Ողջոյն Քեզ Մարիամ...
    Ո՜վ ցաւագին Մարիամ, բարեխօսէ՛ ինծի համար, որ քեզի կը դիմեմ: Ո՜վ ցաւագին Տիրամայր, սրտիս մէջ կը ծագի յոյսը՝ թէ զիս պիտի լսես անպայման: Այս է շնորհքը (...) որ կ'ակնկալեմ քեզմէ եւ ամբողջ սիրտս կը նուիրեմ քեզի:
    Ողջոյն Քեզ Մարիամ...
    Ո՜վ ցաւագին Մարիամ, բարեխօսէ՛ ինծի համար, որ քեզի կը դիմեմ: Ամէն:

  • Տէր Յիսուս, Երանելի Իգնատիոս Մալոյեանը Քեզ շատ սիրեց իր կեանքին ընթացքին ու յաճախ դիմեց Քեզի արտասանելով Քու Ս. Անունդ։ Ան՝ իր կեանքն ալ զոհեց Քու սիրոյդ եւ ժողովուրդիդ փրկութեան համար՝ յանձն առնելով չարչարանքներն ու մարտիրոս- ութիւնը։ Շնորհէ՛ մեզի, ո՜վ Տէր, անոր բարեխօսութեամբ, հետեւեալ շնորհքը..., զոր Քեզմէ կը խնդրենք, որպէսզի կարենանք հետեւիլ անոր օրինակին, նմանիլ անոր առաքին- ութիւններուն եւ տեսնել օր առաջ անոր պսակումը փառքով, զոր Եկեղեցին կը շնորհէ սուրբերուն։ Ամէն։
    Հայր մեր... Ողջոյն քեզ... Փառք Հօր...

Մայիսեան Ջերմեռանդութեան Փակում եւ Քահանայական Ձեռնադրութիւն

Ընկալեալ սովորութեան համաձայն՝ իւրաքանչիւր տարուայ Մայիսի վերջին կիրակին վերածուած է Զմմառու Տիրամօր ուխտի օրուայ: Այս տարի եւս 28 Մայիս 2017-ի առաւօտեան ժամը 10:00-ին, Զմմառու Պատրիրարքական միաբանութեան հայրերը՝ մեծ սիրով հիւրընկալեցին՝ Զմմառու մայրավանք բարձրացող Լիբանանահայ հաւատացեալներու հոծ բազմութիւնը, որոնք եկած էին իրենց ուխտը կատարելու՝ Զմմառու հրաշագործ Տիրամօր առաջ:

Սոյն տօնակատարութիւնը զուգադիպեցաւ Հայաստանի անկախութեան 99-րդ տարեդարձի տօնախմբութիւններուն: Տարին յատկանշական էր նաեւ, որ ջերմեռանդութեան միացաւ բարեշնորհ՝ Տիգրան Սարկաւագ Փիլիպպոսեանի քահանայական ձեռնադրութիւնը:

Ձեռամբ՝ Ամեն. եւ Գերջ. Տէր Գրիգոր Պետրոս Ի. Կաթողիկոսի: Խարտաւիլակութեամբ՝ Գերպծ. Հ. Գաբրիէլ Թ.Ծ.Վրդ. Մուրատեանի՝ Պատրիարքական Փոխանորդ Զմմառու Պատրիարքական Կղերի Միաբանութեան եւ մեծաւոր Զմմառու վանքի: Առընթերակայութեամբ՝ Գեր. Բարսեղ Վրդ. Պաղտասարեանի, տեսուչ՝ Զմմառեան Միաբանութեան Ս. Միքայէլ Ընծայարանի եւ Երանելի Իգնատիոս Մալոյեան Դպրեվանքի եւ Գեր. Մովսէս Վրդ. Տօնանեանի՝ ընդհանուր Քարտուղար Զմմառու Միաբանութեան: Ներկայութեամբ՝ Զմմառու Կղերի Միաբանութեան եպիսկոպոսներուն, քահանաներուն, կղերիկոսներուն, Պետական երեսփոխաններու, կրթական, մշակութային, բարեսիրական, եւ այլ բնագաւառներու մէջ ծառայող այրերու եւ նորօծ քահանային ծնողաց՝ որոնք ժամանած էին Հալէպէն:
Խորանին սպասաւորեցին Զմմառեան Միաբանութեան Ս. Միքայէլ Ընծայարանի եւ Երանելի Իգնատիոս Մալոյեան Դպրեվանքի սաները: Իսկ «Արծիւեան» երգչախումբը կատարեց Սուրբ եւ Անմահ Պատարագի երգեցողութիւնը, ղեկավարութեամբ՝ Տիար Մանուէլ Քէշիշեանի:
Վանք ժամանած ուխտաւորները Տիրամօր արձանը վեր պահած թափօրով հասան Հայոց Ցեղասպանութեան 100-ամեակի առթիւ կառուցուած՝ Երանելի Իգնատիոս Մալոյեան ամփիթատրոն: Ապա՝ Սուրբ եւ Անմահ Պատարագի թափօրը դէպի նոյն վայրը՝ ուր ընթացք առաւ հոգեպարար արարողութիւնը: Յընթացս Սուրբ եւ Անմահ Պատարագին եւ ձեռնադրութեան արարողութեան՝ հաւատացեալներուն ընդհանրապէս եւ մասնաւորաբար նորօծ քահանային՝ Տիգրան Փիլիպպոսեանին, իր հայրական պատգամը փոխանցեց Ամեն. Հոգեւոր Տէրը: Ան նախ ընդհանուր գիծերու մէջ ներկայացուց Տիրամօր խոնարհ, բարի, առաքինի եւ ամենակարեւորը անոր Աստուածամայր եւ Աստուծոյ նուիրեալ ըլլալու հանգամանքը: Ապա Հոգեւոր Տէրը հոգիներու փրկութեան ի խնդիր կենսական համարեց քահանաներու դերակատարութիւնը, որոնք իրենց ճշմարիտ քարոզչութեամբ կրնան ճիշտ ուղիով հունաւորել մարդոց վարքագիծն ու կենցաղը: Ետքը անդրադառնալով նորօծ քահանային կոչման հաւատարմութեան ուխտին, Հայրապետը նշեց, որ ինքն իր անձը անվերապահ պէտք է նուիրէ Տիրոջ ծառայելու ամենավեհ եւ ամենանուիրական գործին եւ իր ամբողջ էութեամբ պէտք է սատարէ Անոր փառքի տարածմանն ու ամրապնդմանը համայն մարդկութեան սրտերուն ու հոգիներուն մէջ:
Յաւարտ Սուրբ եւ անմահ պատարագին՝ օրուայ արարողապետ՝ Հ. Մաշտոց Վրդ. Զահթէրեան ընթերցեց Սրբազան Քահանայապետ՝ Ֆրանչիսկոս Պապի առաքած Առաքելական Օրհնութեան գիրը, որմէ ետք ներկաները շնորհաւորեցին Հայրապետին, Մեծաւորին, նորօծ Քահանային ու անոր ծնողաց:
Շնորհաւորութիւններուն յաջորդեց եղբայրական ագապ Միաբանութեան Դպրեվանքի սեղանատան մէջ, որու ընթացքին նորօծ քահանան խօսք առնելով շնորհակալութիւն յայտնեց բոլոր անոնց՝ որոնք նեցուկ կանգնեցան իր կոչմանը մէջ եւ նպաստեցին՝ հասնելու Սուրբ խորանին: Այնուհետեւ հերթաբար կարդացուեցաւ բոլոր օտարերկրեայ Միաբանակիցներու կողմէ ուղարկուած շնորհաւորական գիրերը: Դրուատանքի եւ շնորհաւորանքի խօսքեր շռայլեց Վանքի Մեծաւոր հայրը: Հացկերոյթի աւարտին ձեռնադրութեան կարկանդակը հատեցին նորօծ Հ. Տիգրան Վրդ. Փիլիպպոսեանը, Ամեն. Հոգեւոր Տէրը, Մեծաւոր Հայրը, Տեսուչ եւ փոխ-Տեսուչ հայրերը, նորօծ քահանային ծնողքը եւ յիշատակի լուսանկարով անմահացուցին օրը:
Յետմիջօրէի ժամը 3:30-ին, կրկին Երանելի Իգնատիոս Մալոյեան ամփիթատրոնին մէջ կատարուեցաւ Մայիսեան ջերմեռանդութեան փակումը Վարդարանի աղօթքով:


Տեղեկատուական գրասենեակ
Զմմառեան Միաբանութեան Եր. Իգնատիոս Մալոյեան Դպրեվանքի

 

 

ԳԼԽԱՒՈՐ ԼՈՒՐԵՐ

  • ԶՄՄԱՌՈՒ ՊԱՏՐԻԱՐՔԱԿԱՆ ԿՂԵՐԻ ՄԻԱԲԱՆՈՒԹԵԱՆ Ս. ՄԻՔԱՅԷԼ ԸՆԾԱՅԱՐԱՆԻ ԱՆՈՒԱՆԱԿՈՉՈՒԹԵԱՆ ՏՕՆ
    ԶՄՄԱՌՈՒ ՊԱՏՐԻԱՐՔԱԿԱՆ ԿՂԵՐԻ ՄԻԱԲԱՆՈՒԹԵԱՆ Ս. ՄԻՔԱՅԷԼ ԸՆԾԱՅԱՐԱՆԻ ԱՆՈՒԱՆԱԿՈՉՈՒԹԵԱՆ ՏՕՆ

     

    Շաբաթ 11 Նոյեմբեր 2017-ի առաւօտեան ժամը 11-ին, Սրբոց հրեշտակապետացն՝ Գաբրիէլի, Միքայէլի և Ռափայէլի, Սերովբէից, Քերովբէից և ամենայն երկնային զօրացն տօնի առթիւ՝ նախագահութեամբ` Տանն Կիլիկիոյ Կաթողիկէ Հայոց Ամենապատիւ և Գերերջանիկ Տէր Գրիգոր Պետրոս Ի. Կաթողիկոս – Պատրիարքի, Զմմառու Պատրիարքական Կղերի Միաբանութեան «Ս. Միքայէլ» դպրեվանքի անուանակոչութեան աւանդական տօնը տեղի ունեցաւ Զմմառու մայրավանքին մէջ:

  • Զմմառու վանք այցելեց Տիար Վարուժան Ներկիզեան:
    Զմմառու վանք այցելեց Տիար Վարուժան Ներկիզեան:

    Կիրակի 12 Նոյեմբեր 2017-ին, առաւօտեան  ժամը 10:30-ին, Զմմառու վանք այցելեց Տիար Վարուժան Ներկիզեան: Ան այս այցելութեան ընթացքին  մասնակցեցաւ Սուրբ և Անմահ Պատարագին, զոր մատոյց Զմմառու Պատրիարքական Կղերի Միաբանութեան Պատրիարքական Փոխանորդ և Զմմառու վանքի Մեծաւոր՝ Հ. Գաբրիէլ Թ.Ծ.Վ. Մուրատեան, մայրավանքի մայր տաճարին մէջ:

  • Ժոզէֆ Եպս. Նաֆֆահ և Մարուն Եպս. Ամմար Զմմառու մէջ
    Ժոզէֆ Եպս. Նաֆֆահ և Մարուն Եպս. Ամմար Զմմառու մէջ

    Չորեքշաբթի 8 Նոյեմբեր 2017-ին, կէսօրին, Զմմառու վանք այցելեցին Հիւիսային Լիբանանի Էհտէն և Զղարթա գաւառներու Մարոնի Թեմի Պատրիարքական Փոխանորդ՝ Ժոզէֆ Եպս. Նաֆֆահ և Սայտայի Մարոնի թեմի Առաջնորդ՝ Մարուն Եպս. Ամմար:

  • Նէհմաթ Ֆրէմ Վանքին մէջ
    Նէհմաթ Ֆրէմ Վանքին մէջ

    Չորեքշաբթի 1 Նոյեմբեր 2017-ին, կէսօրին, Զմմառու վանք այցելեցին Լիբանանցի գործարար` Տիար Նէհմաթ Ֆրէմ և իր գործակիցը:

View All

inside picture