նորություններ
  • Ո՜վ ցաւագին Տիրամայր, ահա քու առջեւդ կը խոնարհիմ իբր խեղճ մեղաւոր: Ընդունէ՛ աղօթքներս եւ արցունքներս:
    Ողջոյն քեզ Մարիամ...
    Ո՜վ ցաւագին Մարիամ, բարեխօսէ՛ ինծի համար, որ քեզի կը դիմեմ: Ո՜վ ցաւագին Տիրամայր, հոգիս յուսահատ է եւ կարիքներու բեռին տակ կքած: Զօրացո՛ւր եւ մխիթարէ` զիս զաւակդ: Կը սիրեմ քեզ եւ կը պաղատիմ քեզի:
    Ողջոյն Քեզ Մարիամ...
    Ո՜վ ցաւագին Մարիամ, բարեխօսէ՛ ինծի համար, որ քեզի կը դիմեմ: Ո՜վ ցաւագին Տիրամայր, սրտիս մէջ կը ծագի յոյսը՝ թէ զիս պիտի լսես անպայման: Այս է շնորհքը (...) որ կ'ակնկալեմ քեզմէ եւ ամբողջ սիրտս կը նուիրեմ քեզի:
    Ողջոյն Քեզ Մարիամ...
    Ո՜վ ցաւագին Մարիամ, բարեխօսէ՛ ինծի համար, որ քեզի կը դիմեմ: Ամէն:

  • Տէր Յիսուս, Երանելի Իգնատիոս Մալոյեանը Քեզ շատ սիրեց իր կեանքին ընթացքին ու յաճախ դիմեց Քեզի արտասանելով Քու Ս. Անունդ։ Ան՝ իր կեանքն ալ զոհեց Քու սիրոյդ եւ ժողովուրդիդ փրկութեան համար՝ յանձն առնելով չարչարանքներն ու մարտիրոս- ութիւնը։ Շնորհէ՛ մեզի, ո՜վ Տէր, անոր բարեխօսութեամբ, հետեւեալ շնորհքը..., զոր Քեզմէ կը խնդրենք, որպէսզի կարենանք հետեւիլ անոր օրինակին, նմանիլ անոր առաքին- ութիւններուն եւ տեսնել օր առաջ անոր պսակումը փառքով, զոր Եկեղեցին կը շնորհէ սուրբերուն։ Ամէն։
    Հայր մեր... Ողջոյն քեզ... Փառք Հօր...

ԶՄՄԱՌՈՒ ՊԱՏՐԻԱՐՔԱԿԱՆ ԿՂԵՐԻ ՄԻԱԲԱՆՈՒԹԵԱՆ Ս. ՄԻՔԱՅԷԼ ԸՆԾԱՅԱՐԱՆԻ ԱՆՈՒԱՆԱԿՈՉՈՒԹԵԱՆ ՏՕՆ

 

Շաբաթ 11 Նոյեմբեր 2017-ի առաւօտեան ժամը 11-ին, Սրբոց հրեշտակապետացն՝ Գաբրիէլի, Միքայէլի և Ռափայէլի, Սերովբէից, Քերովբէից և ամենայն երկնային զօրացն տօնի առթիւ՝ նախագահութեամբ` Տանն Կիլիկիոյ Կաթողիկէ Հայոց Ամենապատիւ և Գերերջանիկ Տէր Գրիգոր Պետրոս Ի. Կաթողիկոս – Պատրիարքի, Զմմառու Պատրիարքական Կղերի Միաբանութեան «Ս. Միքայէլ» դպրեվանքի անուանակոչութեան աւանդական տօնը տեղի ունեցաւ Զմմառու մայրավանքին մէջ:

Առաւօտեան ժամը 11-ին, վանքի Մայր Տաճարին մէջ Սուրբ և Անմահ պատարագ մատուցանեց դպրեվանքի Տեսուչ` Գեր. Գրիգոր Վրդ. Պատիշահ: Սուրբ և Անմահ Պատարագին իրենց մասնակցութիւնը բերին Արհիապատիւ Գերապայծառ Տիարք, Զմմառու Պատրիարքական Կղերի Միաբանութեան Պատրիարքական Փոխանորդ և Զմմառու վանքի Մեծաւոր՝ Հ. Գաբրիէլ Թ.Ծ.Վ. Մուրատեան, Պապական Նուիրակի ներկայացուցիչ՝ Իվան Սանթուս, Լատինաց առաջնորդ՝ Սեզար Էսայեան, Աբբահայրեր, Գերյարգելի Գերապատիւ Վարդապետներ, Մայրավանքի Վարչական Հայրեր, Արժանապատիւ Քահանայ Հայրեր, Բարեշնորհ Սարկաւագներ, Անարատ Յղութեան Միաբանութեան Առաքինազարդ քոյրեր, Նախկին նախարար՝ Մեթր Յակոբ Չուխատարեան, կրթական, մշակութային եւ այլ ոլորտներու ներկայացուցիչներ և մեծարգոյ հիւրեր: Ս. Խորանի սպասարկութիւնն ու Պատարագի երգեցողութիւնը կատարեցին Դպրեվանքի սաները:

Յաւարտ Ս. Պատարագին՝ Ամենապատիւ Հոգեւոր Տէրը, վանքիս Մեծաւոր Հայրը, դպրեվանքի տեսուչ՝ Հ. Գրիգորն ու փոխ տեսուչ՝ Հ. Տիգրան Վրդ. Փիլիպպոսեանը, ինչպէս նաեւ վանքիս Վարչութիւնը ուղղուեցան վանքի դահլիճը, ուր ներկաներուն շնորհաւորանքները ընդունեցին: Այս առթիւ՝ դպրեվանքի սեղանատան մէջ ընթացք առաւ հացկերոյթը, ուր դպրեվանքի սաները գեղարուեստական յայտագիր մը ներկայացուցին: Ողջոյնի խօսքով հանդէս եկաւ նորընծայ` Ռոպէր Թորանեանը հայերէն լեզուով, իսկ Ֆրանսերէնով՝ Սարգիս Մարաշլեան: Ապա սաները հնչեցուցին դպրեվանքի քայլերգ «Օ'ն դու ակումբ հրեշտակապետաց» եւ Ե. Չարենցի «Ես իմ անուշ Հայաստանի» օրհներգը:
Օրուան սրտի խօսքը փոխանցեց` Տեսուչ Հայր Սուրբը, զոր հանգամանօրէն ներկայացուց`այսօր հայ իրականութեան մէջ տպագիր մամուլի դերակատարութիւնը, առանձնացնելով` Լիբանանահայ Կաթողիկէ մամուլը: «Այս տարի երբ համայնքս կը նշէ՝ Հայ Կաթողիկէ Պատրիարքութեան պաշտօնաթերթ «Աւետիք» հայագիտական հանդէսի հիմնադրութեան 85 ամեակը, ըսաւ ան, պատեհ առիթ է, վերարժեւորելու լիբանանահայ կաթողիկէ մամուլը եւ «Աւետիք» պարբերականը ի մասնաւորի, բացայայտելով անոր ներդրած աւանդին տարողութիւնը հայ մամուլին մէջ, ինչպէս նաեւ ընդհանուր գիծերով ներկայացնել անոր անցած պատմական ուղին: «Աւետիք» պաշտօնաթերթը, որուն նշանաբանը եղած է « Աւետիք Բարեաց ուրախ առնեն» Առակաց խօսքը, իր հիմնադրութեան առաջին իսկ օրէն՝ նպատակասլաց եղած է՝ ըլլալ զօդ միութեան նուիրապետութեանս այլեւայլ մարմիններուն, բացայայտելով կաթողիկէութեան մէջ ապրող հայութիւնը եւ հայութեան մէջ կաթողիկէ կեանքը: «Աւետիք» պաշտօնաթերթին մէջ լայն տեղ տրուած են հովուական, համայնքային, ներհամայնքային, կրօնական, հայրաբանական, ծիսական, իմաստասիրական, բարոյական, եւ ընկերային այժմէական հարցեր, որոնք մեծապէս կը շահագրգռեն այսօր մարդկութեան բոլոր խաւերը: Ամենապատիւ եւ Գերերջանիկ Տ. Աւետիք Պետրոս Չորս եւ տասաներորդ (ԺԴ) Արփիարեան՝ պարթեւօրէն հասագեղ եւ հայակենցաղ երջանկայիշատակ հայրապետի նախաձեռնութեամբ կեանքի կոչուած սոյն պաշտօնաթերթին մէջ, մենք կը տեսնենք՝ հոյլ մը մտաւորականներ որոնք մեծապէս նպաստեցին անոր վերելքին եւ որոնք յիշատակութեան արժանի են, ինչպիսիք՝ Սահակ Կոգեան, Մեսրոպ Թերզեան, Վարդան թէքէեան, խաչիկ Աթանասեան, Միքայէլ Մոմճեան, Ղեւոնդ Տէր Մինասեան, Օգոստինոս Հատտատեան, Հրաչ քաջարենց, Մեսրոպ Ճուրեան, Լուսահոգի Անդրանիկ Կռանեան, Մեսրոպ Հայունի եւ ուրիշներ, որոնք իրենց հմուտ յօդուածներով եւ բանասիրութիւններով յաւերժացուցին «Աւետիք» պաշտօնաթերթը, եւ մեծապէս նպաստեցին հայագիտական որոլտի զարգացմանը»: Իր խօսքին աւարտին՝ տեսուչ հայրը հրաւիրեց Ամենապատիւ եւ Գերերջանիկ Հոգեւոր Տիրոջ, Մեծաւոր Հօր, եւ փոխտեսուչին ու միասնաբար «Կանչ Հրեշտակապետին» 18-րդ համարի գինեձօնը կատարեցին, և հանդիսութեան կարկանդակը բեկանեցին:
Հուսկ՝ Ամենապատիւ և Գերերջանիկ Հոգեւոր Տէրը` իր հայրապետական պատգամը ուղղեց ներկաներուն և յատկապէս յորդորեց նորընծաներն ու ժառանգաւորները, որ անսասան մնան իրենց կոչման մէջ: Ան ըսաւ. «Հրեշտակապետաց այս տօնին առթիւ՝ ի խորոց սրտի կը մաղթեմ որ Ս. Հոգւոյն շնորհքով, եւ Ցաւագին Տիրամօր բարեխօսութեամբ կարենաք յաղթահարել եկեղեցւոյս բոլոր դժուարութիւնները, ի փառս Աստուծոյ եւ ի բարգաւաճումն Ազգիս Հայոց»: Իր խօսքի աւարտին Հոգեւոր Տէրը շնորհաւորեց բոլոր անոնց, որոնք կը կրեն Հրեշտակապետերուն անունները`ի դէմս Մեծաւոր Հօր`Գերպծռ.Գաբրիէլ Թ.Ծ.Վ.Մուրատեանին:
Ս. Միքայէլ ընծայարանի տօնակատարութիւնը իր լրումին հասաւ Տէրունական աղօթքով:

 

Saint michelSaint-michel-4

ԳԼԽԱՒՈՐ ԼՈՒՐԵՐ

  • Զմմառու Վանքի Ուխտի Օր
    Զմմառու Վանքի Ուխտի Օր

    Զմմառու վանքի Վարչական Խորհուրդին կազմակերպութեամբ, Կիրակի 27 Մայիս 2018-ին, մեծ շուքով տօնախմբուեցաւ Ս. Աստուածածնի նուիրուած աւանդական Ուխտի Օրը:

  • Գիտաժողով Վենետիկի Ս. Ղազար կղզիին մէջ
    Գիտաժողով Վենետիկի Ս. Ղազար կղզիին մէջ
    2017-18 թուին, մեծ շուքով յիշատակուեցաւ Մխիթարեան Միաբանութեան, Վենետիկի Ս. Ղազար կղզի հաստատման երեք հարիւրամեակը: Այս առթիւ կազմակերպուեցան յոբելինական հանդիսութիւններ, որոնց շարքին նաեւ գիտաժողով մը՝ «Մխիթար և Մխիթարեաններ. Քրիստոնէական լուսաւորութեան դպրանոց մը» տիտղոսով: 
  • ՅԱՐՈՒԹԻՒՆ Տ.Մ.Յ. ՔՐԻՍՏՈՍԻ
    ՅԱՐՈՒԹԻՒՆ Տ.Մ.Յ. ՔՐԻՍՏՈՍԻ
    Հնաւուրց Զմմառու Մայրավանքի՝ խնկաբոյր Ս. Կուսի Վերափոխման եկեղեցւոյ մէջ՝ Քրիստոսի Հրաշափառ Յարութեան օրը, 1 ապրիլ 2018ին, առաւել ուրախ եւ խանդավառ մթնոլորտ մը կը թեւածէր:
  • Ծաղկազարդ
    Ծաղկազարդ

        Կիրակի 25 Մարտ 2018-ին, Ծաղկազարդի տօնին առթիւ՝ առաւօտեան ժամը 10:30-ին, Զմմառու վանքի մայր տաճարին մէջ պատարագեց և քարոզեց Զմմառու Պատրիարքական Կղերի Միաբանութեան Փոխանորդ և վանքիս Մեծաւոր՝ Գերպ. Հ. Գաբրիէլ Թ.Ծ.Վ. Մուրատեան: 


        Մեծաւոր Հայրը անդրադառնալով Ծաղկազարդի խորհուրդին, ըսաւ. «Պատմութեան ընթացքին բազմաթիւ արքաներ յաղթական մուտք գործեցին Երուսաղէմ, սակայն անոնք երկրաւոր և ժամանակաւոր էին: Իսկ Քրիստոս իբրեւ յաւիտենական և երկնաւոր արքայ մուտք գործեց Երուսաղէմ քաղաք»:
       Ս. Պատարագի աւարտին, տեղի ունեցաւ ձիթենիի ճիւղերու օրհնութիւն: Այնուհետեւ պատարագիչ Հայրը, վանքիս Վարչական Խորհուրդի ու վանաբնակ հայրերը, «Ս. Միքայէլ» և «Երան. Մալոյեան» դպրեվանքի սաները, ինչպէս նաեւ բազմաթիւ ուխտաւոր հայորդիներ թափօրով ուղղուեցան դէպի վանքիս մայր եկեղեցւոյ աւագ դուռը, ուր տեղի ունեցաւ Անդաստան և օրհնուեցան աշխարհի չորս ծագերը: 
        Ծաղկազարդի տօնակատարութեան յաջորդեց Դռնբացէքի հնաւանդ արարողութիւնը, որմէ ետք՝ վանքի մայր դահլիճին մէջ տեղի ունեցաւ շնորհաւորութիւն և յաւուր պատշաճի հիւրասիրութիւն:
     
View All

inside picture