նորություններ
  • Ո՜վ ցաւագին Տիրամայր, ահա քու առջեւդ կը խոնարհիմ իբր խեղճ մեղաւոր: Ընդունէ՛ աղօթքներս եւ արցունքներս:
    Ողջոյն քեզ Մարիամ...
    Ո՜վ ցաւագին Մարիամ, բարեխօսէ՛ ինծի համար, որ քեզի կը դիմեմ: Ո՜վ ցաւագին Տիրամայր, հոգիս յուսահատ է եւ կարիքներու բեռին տակ կքած: Զօրացո՛ւր եւ մխիթարէ` զիս զաւակդ: Կը սիրեմ քեզ եւ կը պաղատիմ քեզի:
    Ողջոյն Քեզ Մարիամ...
    Ո՜վ ցաւագին Մարիամ, բարեխօսէ՛ ինծի համար, որ քեզի կը դիմեմ: Ո՜վ ցաւագին Տիրամայր, սրտիս մէջ կը ծագի յոյսը՝ թէ զիս պիտի լսես անպայման: Այս է շնորհքը (...) որ կ'ակնկալեմ քեզմէ եւ ամբողջ սիրտս կը նուիրեմ քեզի:
    Ողջոյն Քեզ Մարիամ...
    Ո՜վ ցաւագին Մարիամ, բարեխօսէ՛ ինծի համար, որ քեզի կը դիմեմ: Ամէն:

  • Տէր Յիսուս, Երանելի Իգնատիոս Մալոյեանը Քեզ շատ սիրեց իր կեանքին ընթացքին ու յաճախ դիմեց Քեզի արտասանելով Քու Ս. Անունդ։ Ան՝ իր կեանքն ալ զոհեց Քու սիրոյդ եւ ժողովուրդիդ փրկութեան համար՝ յանձն առնելով չարչարանքներն ու մարտիրոս- ութիւնը։ Շնորհէ՛ մեզի, ո՜վ Տէր, անոր բարեխօսութեամբ, հետեւեալ շնորհքը..., զոր Քեզմէ կը խնդրենք, որպէսզի կարենանք հետեւիլ անոր օրինակին, նմանիլ անոր առաքին- ութիւններուն եւ տեսնել օր առաջ անոր պսակումը փառքով, զոր Եկեղեցին կը շնորհէ սուրբերուն։ Ամէն։
    Հայր մեր... Ողջոյն քեզ... Փառք Հօր...

Վանքերու և Սրբավայրերու ուխտագնացութեան միութեան հերթական ժողովը

Շաբաթ 3 Փետրուար 2018-ին, առաւօտեան ժամը 10:00-ին, Զմմառու վանքին մէջ գումարուեցաւ Վանքերու և Սրբավայրերու ուխտագնացութեան միութեան հերթական ժողովը: Ժողովին իրենց մասնակցութիւնը բերին Լիբանանի ամբողջ տարածքին գտնուող կաթողիկէ սրբավայրերու վանահայրեր, մայրապետներ և պատասխանատուներ: Անոնք եկած էին հեռաւոր շրջաններէ Զմմառու վանք ներկայ գտնուելու այս ժողովին: Վանքի մայր դահլիճին մէջ Միաբանութեան Պատրիարքական Փոխանորդ և վանքի Մեծաւոր՝ Հ. Գաբրիէլ Թ.Ծ.Վ. Մուրատեան և Վարչական Հայրերը ընդունեցին յարգոյ հիւրերը: Մեծաւոր Հայրը բարի գալուստի խօսք ուղղելով ներկաներուն, անդրադարձաւ Զմմառու վանքի պատմութեան զանազան հանգրուաններուն մինչեւ ներկայ օրերս, շեշտելով այն իրողութիւնը որ Զմմառու վանքը ընդհանրապէս Լիբանանի և Լիբանանահայութեան պատմութեան ընթացքին մեծ դերակատարութիւն ունեցած է որպէս Հ. Կ. Պատրիարքական Աթոռ և ուխտավայր: Այնուհետեւ ժողովական Հայրերն, առաքինազարդ քոյրերն ու պատասխանատու անձնաւորութիւնները ուղղուեցան «Արծիւեան» ժողովասրահ, ուր տեղի ունեցաւ ժողովը: Ժողովի բացման՝ Մեծաւոր Հայրը շեշտը դրաւ ուխտագնացութեան գաղափարին վրայ և անդրադարձաւ Միջին Արեւելքի մէջ ապրող քրիստոնեայ համայնքներու հոգեւոր և մշակութային վիճակին: Ան ըսաւ թէ «վանքերն ու սրբավայրերը քրիստոնէական կեանքի և հաւատքի խորհրդանիշ են, ինչպէս նաեւ գիտութեան, հոգեւոր և իմացական լուսաւորութեան կեդրոններ են և ամէն գնով պէտք է պահպանենք զանոնք»: Ապա Միութեան նախագահ՝ Հ. Խալիլ Ալուան խօսք առնելով, անդրադարձաւ վանքերու և սրբավայրերու միութեան աշխատանքին և ծրագիրներուն, ըսելով որ ուխտագնացութիւնը կը վերանորոգէ քրիստոնէութիւնը Միջին Արեւելքի մէջ և առաւելապէս կ'արմատացնէ քրիստոնեան իր հողերուն վրայ, տէր կանգնելով դարաւոր սրբավայրերուն: Յաջորդաբար խօսք առին վանքերու վանահայրերն ու քոյրերը, որոնք հակիրճ կերպով ներկայացուցին իրենց գործունէութիւնը և իրագործուելիք ծրագիրները: Ժողովի աւարտին հիւրերը ընկերակցութեամբ վարչական հայրերուն, շրջան ըրին վանքի զանազան բաժինները՝ մայր տաճար, մատենադարան, թանգարան և գինեմառան, որմէ ետք՝ Միաբանութեան սեղանատան մէջ եղբայրական ագապի տեղի ունեցաւ բոլորի

մասնակցութեամբ և որու ընթացքին բարեմաղթութիւններ կատարուեցան: Յարգոյ ժողովականները խորապէս ազդուած կատարուած օրուան հիւրընկալութենէն, Զմմառու վանքէն մեկնեցան իրենց հետ տանելով քաղցր յիշատակներ:

ԳԼԽԱՒՈՐ ԼՈՒՐԵՐ

  • Վանքերու և Սրբավայրերու ուխտագնացութեան միութեան հերթական ժողովը
    Վանքերու և Սրբավայրերու ուխտագնացութեան միութեան հերթական ժողովը

    Շաբաթ 3 Փետրուար 2018-ին, առաւօտեան ժամը 10:00-ին, Զմմառու վանքին մէջ գումարուեցաւ Վանքերու և Սրբավայրերու ուխտագնացութեան միութեան հերթական ժողովը:

  • Յարութ փամբուկճեան վանքը կ'այցելէ
    Յարութ փամբուկճեան վանքը կ'այցելէ

    Շաբաթ 6 Յունուար 2018-ին, կէսօրուայ ժամուն, Զմմառու վանք այցելեց հայ ժողովրդային երգիչ՝ Յարութ փամբուկճեան, ընկերակցութեամբ իր նուագախումբի անդամներուն և արուեստագէտ Պրն. Անթուան Պեզճեանի:

  • Աստուածայայտնութեան տօն
    Աստուածայայտնութեան տօն

    Շաբաթ 6 Յունուար 2018-ին, առաւօտեան ժամը 10:30-ին, Աստուածայայտնութեան տօնին, Զմմառու Վանքի Մայր Տաճարին մէջ, Զմմառու Մայրավանքի Ընդհանուր Մատակարար՝ Հ. Անտոն Վրդ. Նորատունկեան Ս. Պատարագ մատուցանեց:

  • UNIFIL-էն Պատուիրակութիւն մը Զմմառ կ՛այցելէ
    UNIFIL-էն Պատուիրակութիւն մը Զմմառ կ՛այցելէ

    Շաբաթ 30 Դեկտեմբեր 2017-ին, առաւօտեան ժամը 11-ին, Զմմառու վանք այցելեցին Լիբանանի հարաւային Շամա բնակավայրէն Խաղաղապահ Զօրախումբի՝ UNIFIL-էն Պատուիրակութիւն մը, նախագահութեամբ՝ հրամանատար Րօտոլֆօ Զկանկայի եւ ընկերակցութեամբ Լիբանանի մօտ Պապական Նուիրակի տեղապահ՝ Գեր. Հ. Իվան Սանթուսի:

View All

inside picture