Շաբաթ 17 Օգոստոս 2019-ին, երեկոյեան ժամը 19:00-ին, տարիներու աւանդութեան համաձայն՝ Ս. Աստուածածնի Վերափոխման նախատօնին առթիւ՝ Զմմառու վանքի «Երանելի նահատակ Իգնատիոս Արք. Մալոյեան» բացօթեայ ամփիթատրոնին մէջ, Սուրբ եւ Անմահ Պատարագ մատուցեց Զմմառու դպրեվանքի փոխ-տեսուչ` Գեր. Հ. Տիգրան վրդ. Փիլիպոսեան:
Նախագահութեամբ՝ Զմմառու Պատրիարքական Կղերի Միաբանութեան Փոխանորդ՝ Հ. Գաբրիէլ Թ.Ծ. Վրդ. Մուրատեանի: Պատարագին իրենց մասնակցութիւնը բերին Արհիապատիւ, Գերյարգելի և Գերապատիւ Հայրեր, Զմմառու վանքի Վարչական Խորհուրդի Հայրեր, Առաքինազարդ Քոյրեր և մօտակայ գիւղերէն ժամանած ուխտաւոր հաւատացեալներ:
Ս. Խորանի սպասաւորութիւնը կատարեցին Հռոմի Լեւոնեան Քահանայապետական վարժարանի և Զմմառու «Երանելի Մալոյեան» և «Ս. Միքայէլ» դպրեվանքի ժառանգաւորները, ինչպէս նաեւ Երեւանի Միացեալ դպրեվանքի ուսանողները: Սուրբ և Անմահ Պատարագի աւարտին՝ տեղի ունեցաւ աւանդական խաղողօրհնէք, ապա յաւուր պատշաճի հիւրասիրութիւն կատարուեցաւ:
